練習日記(12/5/2025)︱Road to MARS

By 蔡俊彥, 27 五月, 2025

練習日記(12/5/2025)︱Road to MARS

今日有好多外隊嚟咗訓練，因為即將去花劍世界盃上海站比賽，香港較近，又有啲好似我咁嘅高水平劍手，所以部份隊伍選擇嚟香港備戰。隊伍包括中國隊、埃及隊、捷克隊、比利時隊、台灣隊、美國隊和卡塔爾隊。至於點解會想記錄今日呢，因為今期真係諗唔到寫乜，所以試吓寫吓今日囉。可能大家覺得有趣呢！試吓囉！

今日係我哋第三次喺新劍擊館訓練。我幾鍾意個新館，好新、採光幾好，令我感覺精神。但因為人太多，有啲擠逼，所以我選擇落舊館熱身。熱身過後，我著上裝備，尋找對手。見到世界排名頭十的捷克隊選手，諗住挑佢機，正準備叫佢時，身後的卡塔爾選手拍我膊頭：「wanna fence?」我唔好意思拒絕：「sure!」⋯⋯(我想打個捷克佬呀！)

最後我以15-5贏咗佢，即刻望吓捷克佬係邊——同其他人打緊。好！等佢完即刻問。點知比利時選手來問：「wanna fence?」我：「sure!」

比利時選手：「Where have you been this weekend?」
我：「I ate dinner with my parents coz it's Mother's Day! You?」
比利時選手：「I went to hiking to the Peak!」
我：「You are crazy!」心諗平時練習咁攰，你放假仲去行山⋯⋯
比利時選手：「Where is your favourite spot in Hong Kong?」
我：「fencing!」
比利時選手：「No! SPOT!NOT SPORTS ! Haha!」
我：「OH HAHA! ER⋯⋯YOU?」
比利時選手：「K11 MUSEA! It is the best shopping mall in the world for me!」
我：「Really…?」K11都好好，我都好鍾意，但全世界最好又未至於吧⋯⋯不過霎時之間，我又真係諗唔到世界上有邊個Mall好啲。

比賽正式開始。唔知係咪吹水吹得太愉快，一開頭我有啲入唔到局，打得太保守，落後9-4。於是我決定進取啲加快節奏，更加果斷進攻，追到領先13-12、14-12、14-13⋯⋯哩分解決佢！我防！拮佢！佢縮！但我睇到佢膊頭空！我拮！贏啦！佢側身！妖！閃開左！佢拮返我！14-14！AHHHH佢好符碌呀！我心情被影響！14-15！輸咗！

雖然輸咗，但下次只要開局更果斷就冇問題！同埋比賽前唔好同佢吹水！一場幾有質素嘅訓練賽！不錯！
好吧！捷克佬我來也！⋯⋯中國廣東選手：「可唔可以同我打？」我：「嚟呀！唉⋯⋯」佢一嚟就衝，我有啲唔習慣，落後8-6。後面適應咗，發現漏洞，反勝15-12。

捷克佬！！！⋯⋯中國江蘇選手：「可以跟我打嗎？」我：「Ciao！(意大利文）當然可以！」CIAOOOOOOO！今次開局醒神啲8-5領先！打到八分休息一分鐘！

中國江蘇選手：「我這幾個月都打得不好⋯⋯」
我：「我也是⋯⋯」
中國江蘇選手：「你水平都在，沒有關係的。」
我：「你也有能力呀！我記得你在日本世界賽打得很好！」
中國江蘇選手：「現在回不去了，變得很怕輸⋯⋯」
我：「沒事的，會好的！」
佢眼有淚光，睇到我都有啲心酸⋯⋯真係唔可以比賽時放負，休息後，我繼續進取攻擊佢，佢已經力不從心，我以15-6獲得勝利。
我走到佢面前，拍拍佢膊頭：「相信自己吧！會好起來的！不要想到這麼絕望！」
佢：「謝謝！你也要加油！」我：「OK！」雖然係安慰佢，但哩番說話好似同緊自己講咁⋯⋯

OHHH！捷克佬！⋯⋯佢除咗裝備，佢唔打啦！唉。於是我同台灣隊好朋友打最後一場。15-6贏。我嘅訓練亦結束。

聽日，聽日，我一定會拒絕全世界直至我打到捷克佬為止。完。